Veganerie Soul
人氣素食品牌Veganerie於曼谷有7間分店，其中之一就係位於Siam Paragon G/F，佢哋嘅賣點係餐點種類豐富，有素腰果芝士漢堡、巴西莓沙冰碗、羽衣甘藍沙律、冬蔭功蘑菇湯、青咖喱意粉、香蕉煎餅與朱古力布朗尼雪糕新地等，最近仲推出杜拜開心果朱古力系列，就算平日唔食開素食都唔怕冇嘢啱食！
另外，佢哋保證所有食物都係100% Plant-Based、無蛋奶兼低糖低卡，部份更係Gluten Free或Nut Free，食完罪惡感大大降低，變相仲有空間可以去Food Court再掃一輪泰奶同小食！Metro Square
如果想食泰國菜但同行人士口味又唔係十分一致，又或者係預計自己行完全日街街想食得再滿足啲嘅話可以選擇呢間被稱為「多合一」餐廳Metro Square，想食清新開胃嘅菜式有士多啤梨魷魚沙律、香烤吞拿魚配泰式醬汁；想要香辣刺激一下味蕾嘅話可選牛肉青咖喱配薄餅；想食海鮮又有蟹肉撈麵與冬蔭功河蝦煲！散叫以外佢哋亦提供多人套餐與90分鐘任食，後者分別有經典餐同豪華餐揀，豪華餐約港幣$240可食到一款自選河蝦菜式、40多款泰菜與任飲汽水。1897 Lounge
Siam Paragon商場後面有間知名度甚高嘅五星級+米芝蓮推介酒店——曼谷暹羅凱賓斯基酒店（Siam Kempinski Hotel），如果大家選擇入住呢度，又或者係想同好姊妹們搵個小角落Chill住享受下午茶，建議大家一定要去佢哋大堂嘅1897 Lounge食份精緻嘅下午茶！
佢哋目前嘅主題係抹茶馬卡龍套餐，由法籍Franck Istel、日籍Chef Yusuke Aoki共同設計，每日13:00~17:00供應，鹹甜點包括香脆三文魚牛油果紫菜脆餅、煙燻鵝肝佐櫻桃醬泡芙、抹茶鬆餅、柚子雲呢嗱白朱古力雪糕蛋糕、焙茶朱古力慕絲與黑松露馬卡龍等。
After You - 全線撤出香港嘅泰式甜品Cafe，招牌菜係芒果糯米飯刨冰、泰奶刨冰
ThongSmith - 非常有人氣嘅船麵品牌，用料高檔，最受歡迎嘅菜式係澳洲和牛船麵
Coffee Beans by Dao - 老字號咖啡廳，唔少當地人都鍾意去飲杯咖啡配蛋糕
Oh My Godmother - 簡稱OMGM，蛋糕設計得可愛精緻，極適合打卡
9" Fried Banana - 當地年輕人話題街頭小食，炸原隻香蕉加雪糕做飯後甜品一流！
Khiri Thai Tea - 被評為泰奶天花板，必試on cloud泰奶茶沙冰
ButterBear - 超高討論度嘅Butte Bear！熊熊牛油曲奇買返嚟做手信啱哂！
