Bubble in the forest 網上訂座
一講到曼谷打卡餐廳，幾乎無人不識嘅Bubble in the forest當然On The List啦！冇錯！呢間馬爾代夫風+水上小屋餐廳係可以用OpenRice網上訂座，仲要可以訂定坐漂浮喺水上面嘅露天圓形座位！留意返，佢嘅位置其實算係曼谷近郊，由市中心出發過去大約需要40分鐘車程。套餐適用於1-6人（約港幣$288起），包一款主餐、小食與甜品，另外推介大家去到加點芒果沙冰、西瓜沙冰呢類顏色鮮艷得嚟又消暑嘅打卡飲品！My Castle Beach 網上訂座
2023年開幕嘅粉紅色人造沙灘主題餐廳My Castle Beach有唔少旅遊KOL都介紹過，其實呢度已經超出曼谷範圍少少，但因為搭MRT紫色線去到Sai Ma站過去都算方便，加上呢度嘅無論室外定室內區都非常有特色，佔地大又難得可以喺湄南河畔玩沙，異國渡假風情滿滿又多餐點選擇，所以唔少人都唔介意花多少少時間過嚟！Che'rie Cafe 網上訂座
Che'rie Cafe位於Siam Paradise Hotel內（鄰近SRT深紅線Bang Khen站），會不定時轉換主題佈置，最近就成間餐廳都佈置成海底世界，行入嚟會見到泡泡波波牆，天花亦掛上有海洋生物倒影嘅薄紗，入面仲有大大個貝殼打卡位，帶小朋友或同姊妹們齊齊嚟影靚相一定影唔停手！餐點方面，佢哋有D.I.Y Pizza、蟹先生牛角包、貝殼朱古力、龜先生泰茶與海洋啫喱芝士蛋糕等主題美食賣相同味道兼備，相信無論係大人定細路都會喺度玩+食得開心！Untill Today Coffee 網上訂座
想親親大自然療養吓身心靈，呢間距離市中心約35分鐘車程嘅簡約花園風Cafe就啱哂！呢度綠樹成蔭，有兒童遊樂區、瀑布、錦鯉池塘（可餵魚亦可足浴），可以話係每個角落都適合打卡影相！呢度設有室外座位（都有冷氣室內位），好多人都話比想像中更涼爽舒適，坐喺度放空飲咖啡、食蛋糕甚至係泰式甜品，旅行嘅疲憊感立即一掃而空！