日圓走勢持續低迷，相信各位熱愛周圍飛又多假嘅朋友近來都飛咗唔少次日本？就嚟冬天怕凍又想搵個新地方散心不如去曼谷啦！其實近年呢度十分流行食Omakase（師傳發辦 / 無菜單料理），唔單止有由日本人、日本師傳越洋開店，就算係當地飲食集團或酒店營運嘅鮨店都一樣於質素上有一定保證，想知佢哋嘅出品同日本或香港店相比如何？心動不如行動啦！尤其旅行日數多，食得多惹味泰菜換換口味，先可以再同各家美食大戰三百回合㗎嘛！
想食到正宗日本人師傳嘅手藝，可以去鮨割烹 朔！事關呢度老闆娘係日本人，而主廚則係擁有35年經驗的大阪人Chef Jun Yokomori，好多食客喺度用餐過後都大讚食材品質極高、裝修佈置雅緻、擺盤獨特又有趣、用餐流程有儀式感十足，尤其係放壽司喺手背上再由師傳噴灑金粉呢個動作真係超級適合大家影相 / 拍片留念！
套餐選擇方面，大多數客人都會選擇招牌24道菜套餐（預付套餐送每人一款飲品，可選柚子果酒 / 梅酒 / 汽水），如果係小鳥胃亦有19道菜套餐可選或可選擇於午市嚟食10道菜套餐。
眾所周知，月球背面（或者叫另一面）係人類至今科技至今都未有辦法探索之地……但呢間喺Social Media上非常受歡迎嘅曼谷日式Omakase店，目標就係同大家一齊往返同想像當中所蘊藏嘅秘密，難怪呢度嘅師傳經常被讚好風趣同識搞氣氛，佢哋都會用唔少適合打卡嘅技術如煙燻泡泡、大量乾冰嚟「表演」，味道方面同時亦兼顧到，尤其係壽司飯（舍利）嘅處理上亦見到係有花心思！
如果係想同伴侶有場浪漫又印象深刻嘅用膳體驗，又想輕輕試試喺曼谷食日本嘢適唔適合自己先，建議可以揀$1,000內就食到嘅午市限定14道菜套餐！$$唔係問題嘅朋友，就當然係衝頂食極盡奢華嘅17道菜套餐啦！餐廳另外亦設有For小朋友嘅Omakase7道菜套餐，親子遊嘅朋友可安心預約~
🥢 YTSB
對地理位置、餐廳知名度及衛生環境有一定要求嘅話，距離BTS Ratchathewi極近、五星級酒店曼谷VIE美憬閣酒店（VIE Hotel Bangkok）旗下餐廳可以話完美符合！YTSB全名為Yellow Tail Sushi Bar，由東京出身嘅Chef Yoji Kitayama所開設，佢同泰國團隊緊密合作，從確保食材每星期三次從日本空運到店，以至於整個用餐過程嘅細節都非常著緊，呢點可以從大家入座時可以揀筷子就感受到！
店內最有人氣嘅套餐係21道菜晚餐，午市時段則有12 / 14道菜套餐可揀選，有4位用餐嘅話更可以預付以享用買3送1優惠（推廣期至明年1月4日為止）！師傳發辦以外，佢哋亦有4道菜晚餐、2位用 / 3位用 / 4位用 Sharing Set，以2位用做例子，大家可以自選4道菜式包括炸三文魚皮沙律、A5和牛壽司、辣吞拿魚卷及鹽燒三文魚等菜式。
🥢 Tenyuu Grand (เทนยู แกรนด์)
🥢 Omakase Ten
呢兩間係鄰近BTS Chong Nonsi及BTS Sala Daeng、位於同一區嘅姊妹店，門口有鳥居、狸貓、櫻花同日式燈籠打卡位。佢哋都會採用從日本直送嘅時令食材，以Omakase形式呈現精緻又精心製作嘅日式料理。
分別係Tenyuu Grand除咗刺身、壽司之外亦偶爾會有其他日式料理如和牛主題套餐、波士頓大龍蝦兩食之類。呢度可以先行預付嘅套餐廳有包括13道 / 15道Omakase套餐，比較有特色嘅係逢星期一至四仲有12道菜+90分鐘任食，任食食物選擇有加州卷、炸蝦卷、三文魚壽司卷、餃子、天婦羅拼盤甚至至卡邦尼意粉，大胃王必定可以食大滿足為止！
而Omakase Ten相對專注於席前壽司服務，座位比較少，唔少當地人都欣賞佢哋服務態度友善之餘，壽司用料既新鮮又有特色，無論係15道菜抑或係17道菜套餐都物有所值甚至係意猶未盡！
