坐落於湄南河邊嘅曼谷蓮花酒店 Lebua Hotels & Resorts知名度向來唔低，一嚟佢係地標性建築，有返咁上下高，自然辨識度高；其二係呢度有4家餐廳、6間酒吧，當中有電影拍攝地又有米芝蓮星級餐廳，間間都有獨特性又有充滿魅力嘅佳餚美酒！莫講話選擇整個旅程入住呢度想食好嘢、想睇靚景嘅願望全部都滿足到，就算只係快閃之旅，都好應該嚟呢度揀返間Rooftop Bar渡過一個浪漫 / Chill / 充滿活力嘅夜晚！
Sirocco 
假如問當地人曼谷蓮花酒店入面邊間餐廳最有人氣，相信唔少人答案都會係於2023及2024都獲得世界烹飪大獎 - 最佳天台餐廳 （World Culinary Awards - World's Best Rooftop Restaurant）及被Thailand Tatler評為最佳餐廳嘅Sirocco！當地人喜歡呢度Goob Vibe又好View，因此呢度亦係熱門求婚場地，相信於如此廝美妙嘅氣氛下，成功機會亦會大增！
呢間天台餐廳位於64樓，作為係Lebua第一家開幕餐廳，賣點係可以欣賞到無敵曼谷天際線壯麗美景（天氣好仲有機會望到星空！）之餘，仲可以邊欣賞現場演奏爵士樂，邊品嚐到充滿異國風情嘅地中海美食！以主廚精選5道菜Tasting Menu為例（會定時轉換菜式），套餐內容有蘋果木煙燻國王三文魚、北海道帶子意大利雲吞、岩手A5和牛等，跟配埋Wine Pairing收費為THB 11,300（約港幣$2,580）
Mezzaluna 
曼谷蓮花酒店內有兩間兩星米芝蓮餐廳，置於最高樓層嘅日法料理Mezzaluna就係其中之一，而且係從2018年開始連續8年都拎到兩星，足見其食物品質同服務態度絕對無容置疑！米芝蓮評鑑大讚佢哋嘅7道菜套餐同時兼備驚喜、精緻同完整性，菜式設計反映佢哋團隊技術高超且發揮穩定。
主理Mezzaluna嘅日籍主廚Ryuki Kawasaki主張只要使用新鮮嘅時令食材，菜色就一定美味。而佢喺呢間餐廳擁有充分嘅創作自由，因此佢一直懷住感激嘅心情，致力為客人提供獨一無二嘅用餐體驗。佢擁有豐富嘅傳統法國料理經驗，擅於利用日本食材同烹調手法去炮製法國菜，招牌菜係幾乎只可以喺呢度食到、選用主廚故鄉新瀉縣村上市產A5和牛製嘅主菜「Charcoal Grilled Niigata Murakami Beef」，炭烤過後肉質依然細膩、入口即化，有機會嘅話一定要一試！
Chef's Table 
Chef's Table嘅靈魂人物對於熟知香港飲食業界嘅饕客嚟講一定認識——曾帶領四季酒店內餐廳 Caprice拎到三星米芝蓮殊榮嘅Vincent Thierry！作為精緻現代法國菜嘅先驅，佢嘅烹飪理念係「簡約地呈現美食就係真正嘅奢華」，著重用高超手藝去展示優質食材最優雅、最自然嘅風味。加入曼谷蓮花酒店後，Chef’s Table於2020年開幕立即斬獲米芝蓮一星，翌年升星同時獲得米芝蓮服務獎（2024年再次獲得），至今仍備受專業評審肯定。
呢度另一個賣點係餐廳直接將廚房放喺中心位置，所有座位都係面向廚房方向，客人可以面對面欣賞烹調過程，又可直接同廚師與侍酒師交流，整個晚餐過程猶如觀賞一場精彩嘅表演，縱然套餐價格不如市面餐廳相宜，依然令人覺得值回票價！
Breeze 
帶同一家大細遊曼谷，總有機會遇到想食中餐嘅要求…呢個時候，位於52樓嘅露天中餐廳Breeze就幫到大家！呢度嘅主廚為來自馬來西亞嘅Sam Pang，烹飪風格係自成一派嘅「Sam Style」，亦即從正宗中餐中汲取精華再加以改良去創造嘅新風味。
餐單方面，佢哋唔單止有適用選擇困難症患者嘅Chef’s Tasting Menu，想因應食量散叫 / 專攻名菜如脆炸荔枝蝦球、松露燒鴨、招牌海鮮蝦籽炒飯嘅亦可。
Breeze另一個值得大家到訪嘅原因係一出電梯行落去餐廳嘅絕美LED天橋打卡位，扮Model行Catwalk拍Reels好有Feel！
Sky Bar與Sirocco處於同一樓層，景色一樣迷人之餘仲係電影《醉爆伴郎團2》（《Hangover 2》）嘅拍攝場地，加上圓形吧台Keep住變色及後面宮廷風圓頂，想搵靚背景打卡嘅絕對Easy！呢度多年來都獲得世界各地嘅Rooftop Bar獎項，同朋友或愛人嚟度飲杯小酒保證難忘！
想同愛人坐喺大梳化浪漫地飲杯精緻調酒，一邊欣賞夕陽西下美景，咁就要去Distil Bar！佢哋以創意與精緻兼備嘅Cocktail及高級干邑白蘭地為主打，同時亦供應口味獨特嘅Davidoff 雪茄。如果選擇住宿於此並預約咗附近或樓上米芝蓮餐廳，大可瞓醒晏覺過嚟飲返杯餐前酒再去食大餐！
全世界最高嘅威士忌天台酒吧！呢度嘅裝修以流線形豪華遊艇為靈感，既有奢華風格嘅內艙室內區，亦有似船頭甲板嘅露天座位。Alfresco 64供應嘅威士忌酒單選擇非常豐富，當中包括The Macallan 25 Years Old Highland Single Malt Sherry Oak Cask、英國皇室認證嘅Johnnie Walker Blue Label “King George V” 與日本山崎25年單一麥芽日本威士忌。
Flute
比起威士忌更喜歡飲香檳？咁同英國皇室御用頂級香檳品牌Bollinger合作嘅Flute就一定要列入必去清單上喇！佢哋最Signature嘅美酒係由Perrier-Jouët 第7代釀酒大師 Hervé Deschamps親自為呢間酒店研發嘅Perrier-Jouët By & For lebua Vintage 2011，而By the Glass則可以飲到Ayala, Rosé, Brut、Bollinger, Special Cuvée, Brut等。去旅行向來都唔介意食豪啲嘅話仲可以喺度揀配生蠔同KAVIARI PARIS魚子醬食！
位於51樓嘅Lebua No.3 定位為可以「輕鬆享用魚子醬」嘅高樓層Gin & Vodka Bar，呢度嘅裝修設計時尚得嚟有神秘感，整體風格比較年輕有活力，所以話想賞景就上64樓，想飲酒狂歡就應該嚟呢度！而且遇著放煙花嘅日子，分分鐘由51樓去睇感覺距離更近！
Pink Bar
Pink Bar雖然主調係粉紅色，但佈置搭配得非常有品味，穿戴大地色系或碎花圖案服飾嚟影OOTD極Match！同好姊妹同遊甚至選擇嚟曼谷搞生日 / Bridal Shower嘅話不妨收藏！而且Pink Bar位置就喺兩星米芝蓮餐廳旁邊，喺呢邊飲杯法國香檳都有眾多選擇，如Comtes de Dampierre Champagne、Larmandier-Bernier, Latitude, Blanc de Blancs Extra-Brut NV與André Clouet, Un Jour de 1911, Blanc de Noirs Brut NV，配小點開胃都好方便！
—------------------------------------
最後溫馨提示大家：曼谷蓮花酒店內所有餐廳同酒吧均設有服裝要求及年齡限制，所有餐廳同酒吧都禁止客人(包括兒童)穿著運動服、泳裝、背心(男士)與沙灘拖鞋。
Chef’s Table、Mezzaluna與Pink Bar更係要求穿著優雅服飾內進，T恤、棒球帽、背心與短褲(男士)都會被拒。特別係Chef’s Table與Mezzaluna禁止男士穿露趾拖鞋內進。
兒童政策方面，Sirocco、Breeze歡迎所有年齡人仕；Chef’s Table、Mezzaluna、Sky Bar與Flûte允許7歲及以上嘅小朋友於有成年人陪同下到訪；餘下4間主題酒吧包括Alfresco 64、Distil、lebua No. 3與Pink Bar都係僅限20歲以上成人使用。