係時候更新一下去曼谷唔可以錯過嘅天台酒吧清單喇！尤其係打算去過聖誕、新年嘅朋友更係要快啲睇！一嚟係因為呢啲日子一定度度都人滿為患，唔想到時先慢慢搵邊間Walk-In有位，覺得個地點、價位都啱就快手Book，分分鐘仲可以享用埋早鳥優惠！
以下8間酒吧有齊Speakeasy、古巴風、威士忌主題甚至係今年新開劇院風、有埋精彩DJ+投影+火舞Show嘅墨西哥風情風格，風景面向又各有不同，想浪漫、想Chill定係想狂歡盡興都冇問題！
連World’s 50 Best Bars 2024第一名都係Speakeasy Bar就知世界酒吧行呢種風格係大勢！如果有留意開曼谷飲食資訊或係特別留意酒吧動向嘅，都應該認識 #FindTheLockerRoom 及其於今年回歸嘅姊妹店Find the Photobooth，但講到要符合今次主題，就當然係呢間外面睇得到但搭Lift去唔到、藏於Hotel Muse 頂樓嘅「神秘」復古歐陸風酒吧啦！
放心，就算係第一次去Speakeasy，呢度嘅接待人員都好Nice，只要仲有位同係開放嘅日子，只要答啱問題或講明想去25樓就會打開秘道放人上去！由於座位不多，呢度比24樓有更高私隱度，想同愛人靜靜地飲杯經典Cocktail如Old Fashioned-1880 A.D.就啱哂啦！
搵酒店同餐廳都鍾意旺中帶靜？呢間酒店天台餐酒吧滿足到之餘仲有3大優點：1. 唔使同大量遊客逼位；2. 從ICONSIAM搭Grab / 的士只須5-6分鐘左右；3. 可以睇到曼谷Asiatique河濱碼頭夜市摩天輪+昭拍耶河河岸美景，如果有放煙花或無人機表演可以睇得超清楚！
佢哋嘅Menu有分為食嘢為主或飲嘢為主嘅各式套餐，前者可選Sharing Set（每位1,490THB，兩位起），有兩份前菜 / 意粉及兩份自選飯類 / 小食配每人一杯酒精飲品，可選嘅Fusion食物包括凱撒沙律、香辣紅蝦、魚露炸雞翼、炒蝦金邊粉及Unicorn意粉等。
飲嘢為主可選1款下酒菜 + 3小時Free Flow Cocktails & Beer（每位899THB）、2款下酒菜配4杯雞尾酒嘅 Sip and Dine Set （每位990THB)。
佢哋最近已公佈推出NEW YEAR’S EVE DINNER （新年前夕晚市套餐；首2位 3,890 THB每位，其後每位1,500 THB），3道菜及2杯飲品，有現場Live Music，有興趣可以透過官方Facebook查詢。最後溫提一下，呢棟建築冇Lift，如果覺得行樓梯有Concern可以再揀揀！
🥂 Seen Restaurant & Bar Bangkok
講到河景空中酒吧，又點可以唔提被譽為有最迷人昭拍耶河View、於Tripadvisor及Google評價都十分好嘅Seen Restaurant & Bar呢！佢嘅位置處於阿瓦尼河濱曼谷飯店頂樓，適合大家行完ICONSIAM / 河濱夜市之後過嚟飲杯小酒。同上一段介紹嘅Rim Rooftop Dining & Bar雖然係面向同一邊，但因為大家高度不同，所以風景都截然不同！
普通日子去話，唔爭在坐低歎埋由名廚Olivier da Costa設計嘅美食，比如話3道菜配90分鐘任飲非酒精飲品+一杯Mocktail（2,099THB）就係個幾唔錯嘅選擇，呢個餐入面既有阿拉斯加皇帝蟹意大利飯、澳洲羊架，亦有招牌Seen Taco、鰻魚鵝肝卷、薄切和牛片（Carpaccio）等多種Fusion菜式可選，飲完杯Mocktail意猶未盡，再飲多杯Cocktail亦得！
而聖誕、新年前夕呢兩個重要日子就當然會有特別套餐同節目，譬如話Countdown Package分為兩種：豪華5道菜配任飲飲品套餐（21,900 THB），兩位送一支精選氣泡酒，保證坐窗邊座位；VIP 6道菜配任飲飲品套餐（75,000 THB），兩位送一支精選氣泡酒，保證坐VIP區座位，有興趣嘅話盡快預約，11月15日前聯絡佢哋Book檯有早鳥優惠！
今年先開張、位於Empire Tower 55樓（近BTS Chong Nonsi 與 BTS Saint Louis）嘅Invitation Only雖然係高空酒吧而唔係天台酒吧，但佢窗邊座位一樣可以俯瞰到迷人景色，加上劇院風大紅色裝修時尚華麗，未正式開張時已有唔少泰國國內同國外報導，而家IG上更係有大量襯哂靚衫喺紅白相間梳化或入口位打卡嘅Tagged Posts & Reels！
餐點方面都配合返路線係偏西式，店家精選菜式有秘魯式北海道帶子刺身（590THB）、葡式辣烤雞串（240THB）、蟹籽辣蝦意粉（360THB）、烤羊架配阿根廷青醬（790THB）。當然，嚟得酒吧又點可以唔飲返杯？同餐廳同名嘅Cocktail以玫瑰花、椰子、蘋果及Pink Gin等材料調製（380THB）、似夕陽美景咁靚，以黑加侖子Gin、紅酒為主調嘅Sangria-O-La（380THB）都值得一試！
Search曼谷天台酒吧，十有其九會介紹到位於曼谷蓮花大酒店（Lebua at State Tower）
64樓、曾為電影《醉爆伴郎團2》（《Hangover 2》）取景地嘅Sky Bar，不過今次嘅主角就唔係佢，而係處於同一層並號稱自己係全球最高嘅威士忌酒吧——Alfresco 64！
呢度嘅裝修設計係交由世界頂級設計團隊DWP負責，佢哋以流線形豪華遊艇為靈感，既有奢華風格嘅內艙室內區，亦有似船頭甲板嘅露天座位。咁當然，既然嚟得同芝華士合作嘅酒吧，飲返杯Chivas Regal Ultis先至係重點！
呢間位於Sky View Hotel頂樓嘅古巴風Rooftop酒吧，鄰近BTS Phrom Phong、EmQuartier、Emporium及2023年底先開幕嘅大型商場EmSphere，氣氛出名熱鬧又極受當地人同旅客歡迎，住喺呢區同鍾意行商場嘅話，冇咩理由唔安排過嚟Chill一Chill吧~
佢哋目前亦已推出12月31日18:30~22:30限定嘅Rockstar / Glamourous自助餐Package，保證入座可睇到城市美景嘅位置，前者係豪華露台座位而後者係VIP露台座位。收費方面，1-4人由14,490THB起，包一支Sparkling Wine （除開每人港幣約$870），1-6人則為20,490THB起，包兩支Sparkling Wine（除開每人港幣約$820）。
其餘日子嚟嘅話（建議星期五因為有Live Music！），可以揀2道菜配2杯Cocktails套餐（1,099THB），嘢食選擇有Taco、Guacamole、燒豬肋骨、燒春雞半隻及秘魯海鮮焗飯等。另外，落雨或大風日子都唔怕，呢度仲有室內座位㗎！
🥂 Cielo Rooftop Sky Bar & Restaurant
Cielo Sky Bar原名為The Zeppelin，位置喺Sky Walk Residences 46樓，距離BTS Phra Khanong 約3分鐘步程，設有全露天、半露天以及室內座位。為咗避免騷擾到住戶，佢哋有專用電梯及專人帶上去，如果係自駕遊，呢度亦有專屬停車場可以泊車。
由於附近冇高樓遮擋視線，就算唔係坐喺第一排露天座位，好天時甚至可以望到去昭拍耶河對岸，建議大家一定要喺夕陽西下之前嚟欣賞天色變化！如果冇其他晚餐或去夜市嘅安排，不妨喺度享用埋泰Fusion套餐，2人用Sharing Set（2,290THB）包一人一杯含酒精飲品同4道自選菜式，可選冬蔭河蝦意大利飯、和牛金麵Style意粉、鵝肝多士、泰式焦糖燉蛋、芒果糯米飯及自家製椰子雪葩。
另外，網上有啲舊資料話呢度冇低消、冇Dress Code要求及可以帶小朋友入場，睇返官方網站就有改動：冇特別註明低消要求、可以帶4歲或以上小孩以及連同小孩在內，所有人都要著Smart Causal，即係唔再可以著拖鞋、短褲、運動裝以至揹背囊都唔可以。
最後壓軸登場嘅係呢間於2023年12月開幕、位於Mövenpick Residences Ekkamai Bangkok Hotel 29樓（從BTS Khlong Tan行過嚟都OK唔算遠）、以墨西哥城市圖倫（Tulum）為主題嘅異國風情天台吧！成日去曼谷玩，又或係上面介紹嘅天台酒吧都大部份去過嘅朋友一定要認識吓！
呢度嘅食物、飲品都係惹味、開胃得嚟又有特色嘅南美Fusion菜，但嚟得呢度玩嘅人應該重點都會放在仿製當地巨型雕塑Ven A La Luz（意思係走進光明）上！呢個由泰國人手製嘅藝術品唔係單純一個打卡點，而係會配合唔同節目有投影演出！此外，呢度亦經常舉辦各式精彩嘅歌舞表演（甚至有火舞！）、DJ亦會配合播放熱帶風情音樂，氣氛極佳，鍾意熱鬧同睇Show嘅話必去！
