無論係畢業旅遊、Double Dating定係親子遊，負責計劃行程最煩惱嘅問題多數唔係去邊玩、點安排交通而係搵食咩！每個人都有唔同嘅飲食喜好，旅遊日數長嘅話當然可以配合大家去勻哂打卡Cafe、天台酒吧、米芝蓮泰國菜，但講到最方便快捷又可以滿足哂大部份人願望嘅答案首選一定係自助餐！雖則話差唔多間間酒店都會有自助餐供應，但去邊食更配合到遊覽景點與購物得嚟仲有獨特主題就要睇下文喇！

曼谷彩虹雲霄酒店——

鄰近水門市場嘅Baiyoke Sky Hotel相信對於成日飛泰國嘅朋友嚟講一啲都唔陌生，其中一個原因係呢度係曼谷最高嘅酒店，無論係從邊個方向望都有好高辨識度。其次係佢嘅地理位置相當優越，徒步可至CentralWorld商場、Big C Supercenter大型超市同四面佛等人氣景點，行街後傍晚過嚟食自助餐兼賞靚景係唔少一日遊建議嘅行程！以下會為大家介紹入面2間特色自助餐，睇完有Feel仲可以24小時隨時網上訂座！

Bangkok Sky Restaurant

位於76及78樓，兩小時晚市自助餐常駐主題為燒烤及海鲜，食物種類非常豐富包括燒烤和牛牛排、泰式和牛 / 黑毛豬豬肉火鍋、刺身、意大利麵、泰式料理同甜品。重點係價格相當實惠，成人每位只須約$220港幣，仲要包埋免費上77樓觀景台與84樓360°旋轉觀景台！

Sky Box Outdoor Zone Bangkok Balcony Rooftop

同情人去旅行就算食自助餐都一樣可以好浪漫！位於81樓嘅Sky Box戶外尊貴無限時晚餐（17:00~22:00；成人約$480一位）可以更直接從高空觀賞到曼谷夜景，鍾意打卡、拍Reels、慢慢歎嘅朋友絕對滿意！

食物內容方面，呢度同位於同一樓層嘅Bangkok Balcony室內自助區 （成人約$320一位）食物內容一樣有煎鵝肝、生蠔、刺身、天婦羅、點心、片皮鴨同甜品，分別在於室內位有限2小時，同埋只有戶外位有得揀一人只限叫一次嘅三道菜精選套餐，套餐內可自選菜式包括吞拿魚芒果沙沙醬沙律、龍蝦濃湯、澳洲助眼牛排等。

Novotel Bangkok on Siam Square——
The SQUARE (Siam Square)

第一次去或係帶哂全家去曼谷旅遊嘅話，大多數網上旅遊攻略都會推介BTS Siam與BTS Chit Lom附近嘅酒店，其中距離前者只有約3分鐘步程嘅曼谷暹羅廣場諾富特酒店評價算係唔錯，不過相信更多人係為咗食佢哋2樓餐廳The Square嘅自助餐而嚟！

呢度星期一至四有抵食點心與任食烤河蝦，可自選叉燒刈包或炒鴨肉碎生菜包，成人每位只須約$170。逢星期五、六晚上更供應海鮮Buffet，成人每位價格約$360就可以任食生蠔、藍蟹、泰式醃三文魚同烤河蝦！而家佢哋做緊河蝦主題，每位客人都包一杯特色無酒精飲品，及可以從咖喱蟹醬配烤河蝦及烤饅頭、冬蔭河蝦意大利飯與焗河蝦配鹹蛋黃蟹膏飯中3選2。

InterContinental Bangkok Sukhumvit by IHG
AVA Brasserie

之前香港有酒店搞日式麵包早餐放題非常受歡迎，顛覆咗好多人對於酒店早餐自助餐通常都頹、貴夾唔飽嘅壞印象。如果大家都想回味或體驗一下食到美味又豐富嘅早餐嗰種幸福感，可以去曼谷旅遊時揀去曼谷素坤逸洲際酒店（近BTS Thong Lor）酒店內餐廳AVA Brasserie。