巡迴曼谷咖啡店💕(三)少女心大爆發
2023-06-04

簡約就是美 + 在森林和原野後,今次同大家去睇一眾由外到內都係咁粉紅嘅打卡系Cafe,只要大家記得唔好著同色系衫褲一定可以喺入面影返唔少爆Like靚相!呢度會「附送」埋一個人氣粉紅景點,喺呢個List度揀返間Cafe加埋就係一個完全滿足到少女心嘅半日行程喇!


1. The Cassette Coffee Bar



搜尋Siam Center附近Cafe或者搵「粉紅色+曼谷」呢組關鍵字嘅話,相信封面圖張粉紅色旋轉門相片絕對會喺第一頁出現,事關佢帶點古典味嘅風格實在太好影喇,唔少泰國當地人都鍾意著靚靚嚟影影影㗎!不過千祈唔好過門不入,因為店入面一樣唔會令人失望,坐低飲杯凍飲如濃厚朱古力&士多啤梨之吻、粉紅檸檬水或由la marzocco咖啡機炮製嘅招牌Orange Latte,再加多件朱古力枕頭蛋糕,等自己沈浸喺呢個夢幻世界入面多一陣啦!


2. Piggies on the pot



邊個諗到咁Pink嘅店面,入面竟然係賣中式早餐?!而且仲要有離鄉別井多時嘅朋友仔所心心念念嘅燒賣!雖然始終唔係香港Local街邊有秘製辣油同豉油嘅魚肉燒賣,但佢哋有嘅係芝士豬肉燒賣、蟹籽豬肉燒賣、香菇豬肉燒賣同鹹蛋黃豬肉燒賣。呢度另外亦有大包同水餃食,可以揀配奶茶、柚子檸檬同粉紅Lemonade,燒賣關注組成員/去旅行去得耐有啲掛住陣港味嘅人仕,大可以去點個心做早餐 / 下午茶,就當係見識吓其他地區嘅點心口味都幾好玩吖 (BTW個外賣盒都係粉紅色!)。唯一問題係呢間小店唔近市區同地鐵站,要去都大機會要Call Grab。


3. Unicorn Cafe



從Chong Nonsi BTS站行過去只要5分鐘就可以遠離世俗,進入呢個超級Fancy嘅獨角獸國度喇!呢間店係連天花板都油埋夢幻幻彩,仲有大量獨角獸公仔喺上面飛(畀啲想像力!),又有造型衫可以借嚟著住影相,真正大人細路都啱玩!咁都未夠,佢哋大部份食物都係彩色系,唔係單講千層蛋糕、Cupcake、雪糕窩夫呢啲甜品喎,係連意粉、薯條同炸蝦蛋包飯都係!


4. Cafe Thieves and Bar



追星一族特別係有留意開Blackpink嘅話,或多或少應該都對呢間Lisa嚟過嘅朝啡夕酒餐廳有印象?餐廳牆身塗上柔和嘅粉色,配上大大個玻璃窗同有型嘅圓鏡同深綠色梳化,明顯唔係單純走可愛ins風,反而可能用時尚 X Vintage嚟形容會更適合。據講Lisa當日喺度食過Fro-yo (Frozen Yogurt) 同Pancake,亦有上過2樓同心型燈牌影相,想同佢拉近關係嘅就跟啦!


5. Thongyoy Cafe



驟眼睇呢間店唔係十分粉紅,點解會歸入呢個清單入面?因為佢係以繁花為主題,入面裝修五彩繽紛,每個角落都有唔同配色,仲有大大幅igable嘅花花牆、粉紅色浴缸同泰文字霓虹燈牌,點影都咁「出色」,嚟影 #OOTD 真係冇得輸!就算唔講影相,呢度主打嘅泰式甜品本身都好值得大家一試,閨蜜們可以直接揀份經典All-Star Set(490泰銖),呢份2人套餐已包8款泰式糕點、手工蛋糕同2杯特調飲品或自選熱茶。成套餐具同茶具都金光閃閃,充滿貴氣㗎(但飲熱嘢就要小心燙手喇)!如果唔肯定食唔食得哂同啱唔啱口味,亦可以直接揀招牌椰奶珍珠蓮花蛋糕或行去玻璃櫃度慢慢睇慢慢揀。


✨Erawan Museum (三頭象神博物館)

📍99 Kanchanaphisek Rd, Bang Mueang Mai, Mueang Samut Prakan District, Samut Prakan 10270 (建議從Pu Chao BTS / Chang Erawan BTS Call車過去)



見到「置頂」嘅巨型象神雕像同自己距離愈嚟愈近就代表去啱地方喇!呢間由泰國富豪建造嘅博物館雖然細細間,但大家唔好以為除咗個粉紅色大門之外就冇特別,其實入面分為「冥界」、「人間」同「天堂」3個區域,每個展區唔係話好大同有好多展品,但好多細節位都值得留意,尤其係樓梯同七彩玻璃天花,細心睇真係會令人感嘆匠人嘅鬼斧神工!行勻成個館大概需時半個鐘,而大家需要留意嘅係佢同其他泰國寺廟一樣係有穿著要求嘅:唔可以著背心衫、唔可以著短裙/短褲同埋要除鞋先可以入內。

OpenRice TH Editor
餐廳資料
更多
收起
本月熱門
曼谷👨‍👩‍👧‍👦親子餐廳大集合
3天前
SWEET SWEET布吉之旅💞浪漫系晚餐4選
3天前