上次同大家睇咗6間設計感100分嘅Cafe，各位咖啡店巡迴師係咪覺得意猶未盡呢？今次呢篇專攻森系，而且6間全部都係真樹、真草地，仲好有在森林和原野Feel！溫提一下，去之前大家要記得帶定蚊怕水、風扇仔同濕紙巾呢啲重要物資咁，到時就可以一直維持住最佳狀態打卡啦！
🌲☕ 與白孔雀共聚皇家花園
去森系咖啡店唔一定要衝出市區嘅，呢間餐廳就位於曼谷中心、BTS Thonglor 同Ekamai之間！之所以喺咁得天獨厚嘅位置，係因為呢棟建築係1930年由當年泰皇送畀Pram Phah Prapae嘅真·公主宮殿！而家呢度成為被大量熱帶植物包圍兼有動物睇嘅人氣餐廳，週末營業時間朝9晚10，日頭以輕食：窩夫、奄列、意粉同薄餅為主，夜晚就有牛扒、羊架同燒春雞等。餐廳分為四個區域：唔對外開放嘅二樓私人區、超多打卡位、行兩步就有天鵝同兔仔睇嘅戶外花園區、可以隔住落地玻璃睇到印度白孔雀嘅室內用餐區、優雅古典風嘅早午餐咖啡室 ，唔知大家又最想坐喺邊呢？
🌲☕露營風觀星Cafe
雖然今次真係要走到去近郊住宅區，但呢間Glamping主題Cafe距離最近嘅車站MRT Phasi Charoen都係約5-6分鐘車程，迷路指數極低之餘睇相都知呢度有幾Chill，相信山系+森系男女子一定唔會想錯過！呢度有分為花園區、營地區同室內座位，最受歡迎嘅營地區私隱度極高，情侶要講肉麻sweet talk都唔怕畀隔離聽到，甚至，有人話夜晚可以喺度睇星星，咁浪漫得唔得㗎？最後提提大家，呢度入口亦有個日系車站打卡位，去前去後記得影埋！
🌲☕城市森林精品咖啡
睇名可能大家諗唔起，但如果有留意開本地YouTuber/ Foodie嘅話唔定睇多兩秒就認得呢間極近BTS On Nut站（步行3分鐘左右咋）、喺酒店群中獨處嘅森林主題Cafe！穿過極似公園嘅磚牆入口會見到小木屋、大樹同木製桌椅，店家仲要好貼心咁提供埋插座等客人可以安心Hea甚至扮工！如果怕曬亦可以行入冷氣開放嘅玻璃屋坐，但大家唔好掛住影影影而忘記呢度另一個賣點——佢哋嘅咖啡豆有部分係自家清邁農場種植，對咖啡有研究嘅仲可以同咖啡師傾點混豆去沖杯完全符合自己心意嘅靚啡！
🌲☕植物園內日系咖啡店
Botanist Activity Space & Cafe
同機場距離30分鐘、市區約45分鐘，搭Grab /的士嘅無料芬多精放題店！呢個植物園入場只收150泰銖而且可以用喺之後間咖啡店度，簡單啲講即係入場費全免！收咁平有伏味？錯喇！呢度總佔地8萬呎，從常見到罕見、由苔蘚到仙人掌等植物（仲有養咗錦鯉嘅池塘！）都有得睇，行到咁上下見攰就可以去咖啡店度小休，而且呢度唔係只有普通咖啡/梳打/果汁，呢間係抹茶主題咖啡店嚟！抹茶控可以揀來自日本唔同產地嘅薄 / 厚 茶跟件抹茶蛋糕，如果平時唔飲開亦可以選擇招牌抹茶咖啡 / 抹茶柚子梳打！
🌲☕英倫溫室莊園
同上面個植物園一樣距離市中心比較遠，餐廳位置喺Suan Luang Rama IX 區，車程大概35分鐘，推介加入做深度遊 / 悠閒半日遊嘅行程之一！呢度由門口行入去沿路都勁似英式莊園，小橋流水再加透光玻璃溫室，真係點影都勁有美感，難怪當地人都好鍾意嚟呢間充滿異國風情嘅餐廳，特別係放假時嚟食份ADB / 炒金邊粉再加件Cake打個卡，成身鬆哂！
🌲☕運河旁的熱帶叢林
從BTS Wutthakat搭車過嚟要20分鐘左右，識泰文 / 泰國通亦可以揀搭巴士，最近嘅巴士站行過嚟呢個熱帶樹林只要3分鐘，單係睇到佢個門口——竹門設計加超多高樹，即將要走入叢林探險嘅氣氛散哂出嚟！但大家唔使驚，入面冇肉食恐龍，只有同主人一齊嚟嘅可愛寵物！面積超大嘅餐廳只有兩個靚靚用餐區域，客人只要決定食咩就知坐邊：河邊歎咖啡食蛋糕 / 竹製小屋入面食傳統泰國菜。