多次入選世界及亞洲最佳50餐廳，曼谷米芝蓮指南，無理由冇佢份，今次就穩奪一星榮譽。Nahm由澳洲籍總廚David Thompson開設，倫敦店於2001開業，6個月後已奪米芝蓮星，當時為全球首間及唯一一間泰國菜館摘星。泰國分店於2010年開業，2014年奪亞洲最佳餐廳No. 1，2017年亞洲最佳50餐廳排行第28位，雖然名次稍跌，但仍不失其地位。
Nahm泰文解作水，餐廳位於酒店池畔。由曾於倫敦店工作嘅總廚Prin Polsuk掌勺，菜式做法參考古老食譜及地道煮法，部分更屬於皇室成員，保證好少地方食到！皇室菜包括前菜Mahor，將豬、雞及蝦及蝦肉碎，伴以蒜頭、莞茜、椰糖和魚露等，放在菠蘿片上，甜酸帶微鹹。帝王魚柚子沙律，配以有香茅及青檸，係典型泰式口味。
菜式將傳統泰菜配上更優質食材，以唔破壞原有味道為重點。平時只飲冬蔭功？試試烤乳鴿蟹肉西米清湯，加入鮮拆蟹肉，令湯頭帶鹹鮮。蟹肉咖喱是南部菜式，加入香蕉花及崩大碗葉，香氣味道更有層次。
食完之後，一致評價為重口味！大廚解釋，白飯係泰國人飲食文化重要一環，主菜就一定要夾埋白飯同吃，因此味道調得較鹹。採用收成唔超過6個月嘅新米，飯香濃厚，白飯係無限任添，食多幾碗喇。
甜品有道蛇皮果糖水，清湯及冰碎之中竟有炸蒜及薑絲！味道甜中帶微鹹，第一次食真係覺得好新奇，原來呢道係泰國人家常菜，夏天時以水果加冰用作消暑。而另一道街頭常見嘅Khanom Bueang，薄脆餅中有鴨蛋黃絲及蛋白等。
食過Nahm，絕對會改寫對泰國菜嘅概念。以為一味酸辣，其實泰菜係有唔同層次、唔同味道，直情好似重新認識咁呀，我會用五味紛陳來形容。可能未必合港人口味，價錢亦都唔係一般泰菜咁平易近人，但絕對係一次好有趣嘅泰菜新體驗。
地址：COMO Metropolitan Bangkok, 27 South Sathorn Road, Tungmahamek, Sathorn, Bangkok
文、相、片：Perrins