曼谷👨‍👩‍👧‍👦親子餐廳大集合
2023-09-24


帶小朋友去泰國旅遊,相信令爸爸媽媽們最頭痛嘅都莫過於食咩好喇!事關講起泰菜,無論係咖哩、冬蔭定泰奶,感覺樣樣都唔係咁適合小朋友日食夜食,尤其係年紀再細啲未接觸過辣嘢嘅,就更加唔知可以同佢食咩好,總唔能夠日日都食麵包或者菠蘿炒飯吧?!今次呢篇合集會為大家介紹幾間父母可以安心去,又唔會距離市區極遠極難搵嘅餐廳,當中除咗有打卡系Cafe、寵物Cafe更有連當地人都鍾意帶囝囝囡囡去嘅泰菜餐廳!

1. Sarnies Roastery


一日之計在於晨,大人就可能想放假瞓到自然醒,但小朋友習慣咗返學起身時間,一定要食份豐富早餐,大家可以選擇嚟呢間每日開07:30,距離BTS Chim Lom站好近、來自新加坡嘅簡約風Cafe——Sarnies Roastery。呢度有分室外同室內座位,室內空間感十足,啲檯櫈仲同學校一模一樣,小朋友見到一定有親切感!


嘢食方面,呢度主打採用本地食材去製作澳洲風情美食,包括自選早餐組合(有水果吐司、牛扒、牛油果、Muffin、泰式香腸等超多選擇)、超健康嘅Brekkie Bowl、營養價值豐富嘅煙三文魚芝士黑芝麻Bagel等。


而平時需要飲「回魂啡」嘅父母,亦可以試試佢哋自家烘焙咖啡,唔少人飲完覺得正仲直接買包豆返屋企自飲同做手信㗎!


2. Cocotte

去曼谷又點少得行商場呢個環節呢?帶住細路去買買買,隨時都要有預備佢哋會悶會叫攰,要搵個地方坐一坐低回氣。呢個時候,位於商場入面嘅餐廳當然係最好選擇啦!Cocotte呢個品牌分別喺Central World、The EmQuartier、Siam Paragon、Central Chidlom都設有走唔同風格嘅餐廳,佢哋嘅嘢食品質穩定同埋係以西餐(法/意)為主,爸爸媽媽們唔使認住佢哋(甚至預約定)就唔使周圍騰啦!包括:


🔹Victoria By Cocotte
走法式Cafe路線有靚靚打卡系甜品同法式牛扒食



🔹Mozza By Cocotte

有招牌芝士輪意粉同眾多Pizza及意式小食


🔹LEON By Cocotte
以法式小餐館模式營運,有熟成牛扒同各式海鮮料理

3. At-Ta-Rote



如果小朋友唔係十分細,爸爸媽媽又敢畀佢哋「入鄉隨俗」試吓惹味泰國菜嘅,大可以嚟呢間裝修得非常光猛舒適又有大張梳化椅坐嘅At-Ta-Rote(距離BTS Phrom Phong站有啲距離,建議都係Call車)體驗吓!點解云云泰菜餐廳中會選擇呢度呢?因為佢哋除咗有泰式傳統宮廷菜同點心,Menu上都有非常多可以自選組合(炒菜/咖哩/飯麵都有得揀要配咩食材同醬汁)及唔辣嘅菜式,譬如話有趣又開胃嘅魚鬆西瓜、偏甜嘅蛋包泰式炒金邊粉、椰子雞湯及燒魷魚等。睇官方消息,呢度仲試過同唔少當地小朋友搞生日會活動,所以Daddy Mommy真係可以放十萬個心!


4. Little ZOO cafe



鍾意小動物嘅話,帶小朋友嚟呢度放電就啱哂喇!呢度佔地超級大並分為5-6個區域,入面有貓貓、狗狗之外仲有鸚鵡、浣熊、狐獴同紅狐可以同客人互動,但同大部份寵物Cafe一樣,呢度畀咗入場費之後就可以喺1小時內隨意行動,但記得唔可以帶外來食物同飲物,亦唔可以未經同意下餵佢哋,只可以睇完之後飲杯嘢同食件餅同帶走入場時送嗰對可愛襪仔。


OpenRice TH Editor
餐廳資料
更多
收起
本月熱門
Youtuber推介▶️!泰國旅行必食!(持續更新)
5天前
2024🏵️亞洲50最佳餐廳 - 曼谷篇 (1-99名)
6天前