眾樂樂👯‍♀️👯‍♂️曼谷聚會餐廳精選
2023-10-22

雖則好多朋友仔去曼谷旅行都鍾意掃街頭小食同行市集為主,但人多起上嚟都總會發現去Walk-In搵位真心唔易,唔通真係餐餐都要食Buffet?其實大家除咗可以參考返之前介紹過嘅 超人氣🔥預約餐廳公開——其他篇 (入面頭兩間餐廳都適合!)、超人氣🔥預約餐廳公開——米芝蓮篇 (同一班追求美食嘅Friend子必去!)之外,以下呢4間餐廳都一樣各有特色、要氛圍有、要打卡有、要有泰國地道嘢食都有!

Khua Kling Pak Sod


想喺曼谷試試辣度有返咁上下勁嘅泰南菜,建議大家嚟試試呢間曾於2018~2020年都拎過米芝蓮推介嘅品牌Khua Kling Pak Sod!佢哋分別有3間分店可以使用網上訂座:(1)BTS Ari站附近,行過去要8分鐘左右;(2) 曼谷蘇拉旺紅色行星酒店2樓 (Red Planet Bangkok Surawong);及(3)位置喺BTS Thong Lor站行過去要10分鐘左右,去到肯亞領事館對面。




Khua Kling Pak Sod喺泰文其實係兩個字:Khua Kling係泰南美食代表乾咖哩而Pak Sod意思係新鮮蔬菜,所以嚟呢度開飯,幾乎係每檯都會點一份泰南特色炒肉碎(Khua Kling Moo Sab)!留意返呢道菜辣度指數極高,平時唔特別食得辣嘅朋友記得叫返杯嘢飲送住食!另外,酸辣味濃嘅蝦醬臭豆炒蝦、泰南紅燒肉、羅望子醬炒蝦及夜來香花/買麻藤葉炒蟹肉都係推介菜色。而呢度亦設有中文菜單,人多起上嚟要再加菜都好方便!(但真係要Book檯!尤其係Thong Lor店經常滿座!)


Hunter's Garden & Restaurant



呢度雖然冇泰國菜食,亦唔係啲咩高級餐廳,但同一大班朋友去玩,氣氛好先係最重要!呢個小花園以室外座位為主,主打英國及歐洲菜,逢星期三、五同日,由晚上18:30開始都會有Live Music。因為店員大部分都可以講流利英語(連SNS都係用英文介紹菜式同活動!),所以呢度唔止當地人,更有為數唔少嘅外國旅客嚟,好多人都話喜歡佢哋嘅薄餅同炸魚薯條(星期日嚟緊係必食佢個燒肉早餐!),配住Apple Cider或手工啤酒聽住音樂,Chill到一時間唔記得自己其實要返香港!


Araksa Tea Room



其實邊個話一班人聚會就一定要飲酒?飲茶或直接溝埋一齊做茶酒都得㗎!呢棟2層高、以茶為主題嘅餐廳於2023年年中先開始營業,佢哋供應自家於清邁茶園種植嘅獲獎泰茶Arakasa Thai Tea及蝶豆花茶,大家可以選擇嚟食份Tea Pairing下午茶,亦可以喺度食到以茶入饌嘅正餐如:炸茶葉配腰果雞肉碎(yum bai cha tod)、蝶豆花飯配各色香草(khao yum)。呢度亦有其他邪惡嘢如牛油炸魷魚、惹味青咖哩同每日限量供應嘅芭蕉葉蒸咖哩辣魚(hor mok pla),晚飯時間嚟嘅配杯以泰國各地為名嘅茶酒Cocktail就唔怕瞓唔著啦:如曼谷Bangkok就係伯爵茶氈酒配白朱古力糖漿、檸檬、泰國李同桃味泡泡;烏泰他尼府(Uthai Thani)就係泰茶、泰威士忌同檸檬柚子嘅組合。


Secret Wonderland




即使唔係全女班旅遊,呢間以愛麗絲夢遊仙景為主題嘅泰西Fusion餐酒館都一樣值得一訪㗎!佢哋佔地極廣,成間餐廳有極多唔同類型嘅佈置,鍾意小橋流水嘅可以坐室外位,要歎冷氣嘅亦可以走入黑白紅(紅心王后Feel)為主調嘅室內位。嘢食方面,呢度餐牌種類非常極之豐富,食牛扒又得,食份泰式炸豬腩肉同河蝦冬蔭功都得,每日17:00~20:00係Happy Hour時間,部份酒精類飲品有買一送一優惠。但大家要注意返,飲飽食醉後,除非係住附近酒店啦,否則都係建議大家Call車直接返酒店或最近車站BTS Ratchathewi / BTS Phaya Thai,畢竟行過去Google Map都話要15~17分鐘!

OpenRice TH Editor
餐廳資料
更多
收起
本月熱門
Youtuber推介▶️!泰國旅行必食!(持續更新)
6天前
2024🏵️亞洲50最佳餐廳 - 曼谷篇 (1-99名)
7天前