超人氣🔥預約餐廳公開——其他篇
2023-07-18

唔使再睇人哋去旅行啲片或相睇到口水長流喇!今次我哋決定公開最新網上預約數據,等大家知道時下最受人歡迎嘅餐廳係邊幾間,下次到自己飛,計劃行程時就可以參考吓然後跟手即Book,完全唔需要考慮語言不通或者要另覓方法去預約,超方便!(註:由於榜上有部份餐廳喺其他文章介紹過,所以會分拆成兩篇,一共9間,米芝蓮篇請往此)


1. Khao Jaan Prod



講起Central World入面嘅餐廳,唔知大家會唔會好直覺咁諗起位於7樓嘅Nara Thai,但其實同層都仲有間極出色泰菜值得關注!講緊嘅係以「記憶中嘅泰菜」為主題,裝修佈置都好優雅嘅Khao Jaan Prod!米芝蓮星星狙擊手係咪覺得呢個名好耳熟甚至已經認得出?冇錯,佢雖然唔係獲得一星嘅總店,但佢係屬於同一品牌旗下,論食材論味道都一定唔會令人失望,更何況佢位於個咁方便嘅地點!



所謂「記憶中嘅泰菜」,亦可以解讀為泰國人嘅家常菜——未必係山珍海味,未必係最經典正宗,但係當地家家戶戶都可以連結得到嘅美味回憶。呢道正正就係由呢個基礎出發,每樣菜式都幾乎能百分百做到色香味俱全。望住種類豐富嘅餐牌茫無頭緒?推介大家可以跟Youtuber小阮同阮太叫馬沙文咖喱、炸鹹魚炒通菜絲同重口味兼邪惡嘅鹹蛋黃紅咖喱炒豬油渣!



2. Ministry of Crab



來自斯里蘭卡嘅過江龍,本店連續多年都喺亞洲50最佳餐廳榜上遊走,於2019年尾進軍曼谷。雖然身為海外分店,但呢度嘅餐牌設計、食材甚至係廚師係嚟自斯里蘭卡,各種蟹類料理由500-600g最細嘅泰國蟹,至由XL(900g)級別起跳嘅斯里蘭卡蟹都有得揀,而10種級別入面最巨嗰款就叫蟹斯拉(Crabzilla),最少重2kg,個鉗大過塊面都係等閒事!如果當日有任何一款Size沽清,廚房上面相對應嘅蟹燈就唔會開,而呢度亦係餐廳其中一個打卡位!



揀好蟹之後就要諗想點食,食得辣嘅當然唔可以錯過招斯里蘭卡黑胡椒蟹或咖哩蟹,拎埋麵包嚟蘸汁食真係好惹味!如果怕辣嘅都可以揀蒸蟹配牛油醬汁,配埋啖啖肉又Creamy嘅白酒汁焗蟹炒飯、坊間少見嘅蟹肝醬多士,一舖過滿足鋪蟹癮,食貴少少都好可以接受!


3. Vertigo (เวอร์ติโก้)





(圖片來源:TszkwanChung)


去曼谷旅遊都有返咁上下資歷嘅話,絕對冇可能唔認識呢間一Search都必定出現嘅天台酒吧啦!作為當年第一間喺五星級酒店(曼谷悅榕莊酒店)開設嘅老牌子,坐擁360度超開揚靚景就不在話下,而且佢呢度亦唔係單單係熱鬧兼有情懷嘅酒吧咁簡單,大家除咗可以嚟飲杯小酒甚至Free Flow同打卡之外,仲可以選擇帶男神/女神嚟呢度食一邊欣賞迷人夜色一邊大嘆高質素嘅4/5道菜浪漫晚餐(所以呢度都有Causal Smart嘅穿著要求,唔好貪方便踢拖著短褲啊)!相信呢度嘅各種配套同氣氛,都一定可以令呢餐飯成為呢次旅行其中一個難忘回憶!


4. Audrey Cafe Glamour





由泰國女明星開設嘅連鎖泰歐Fusion餐廳,呢間分店位於Central Embassy商場入面,比起其餘多間分店地點方便得嚟又不至於每時每分都人頭湧湧,有分店限定Menu之餘又可以網上預約,超適合想行完商場直接原地食飯嘅一家大細/姊妹團嚟朝聖!推介大家必食兼打卡嘅菜式包括有蟹肉梳乎厘配龍蝦白蘭地醬、脆皮一口豬及泰奶千層蛋糕。

OpenRice TH Editor
餐廳資料
更多
收起
本月熱門
Youtuber推介▶️!泰國旅行必食!(持續更新)
6天前
2024🏵️亞洲50最佳餐廳 - 曼谷篇 (1-99名)
7天前