唔使再睇人哋去旅行啲片或相睇到口水長流喇！今次我哋決定公開最新網上預約數據，等大家知道時下最受人歡迎嘅餐廳係邊幾間，下次到自己飛，計劃行程時就可以參考吓然後跟手即Book，完全唔需要考慮語言不通或者要另覓方法去預約，超方便！(註：由於榜上有部份餐廳喺其他文章介紹過，所以會分拆成兩篇，一共9間，其他篇可以往此)
1. Blue Elephant (บลู เอเลเฟ่นท์) 
大名鼎鼎嘅藍象，分店遍佈全世界，相信就算唔係泰國通都唔會唔識！不過講返轉頭，大家又知唔知以泰國皇室料理為招牌嘅佢，其實發源地唔係曼谷而係比利時呢？話說當年由細到大都係識食之外嘅創辦人Nooror Somany Steppe往海外求學同結婚，佢發現泰國菜喺異地係小眾選擇，所以就有咗要將呢份人間美味宣揚開去嘅大志，之後佢就憑住家傳之寶——瑪莎曼咖哩(Massaman)食譜成功於1980喺比利時闖出一片天，然後再於2002年回流返泰國並喺曼谷開設呢間分店。
而講到曼谷呢間分店，好多去過嘅都會對佢有以下印象：(1) 交通方便，位於在BTS Surasak 站約3分鐘步程；(2)三層高百年淡黃色建築極Signature，日夜各有味道，非常適合打卡；(3)室內裝修佈置典雅，充滿歷史氣息；(4) 每道菜都精緻得嚟又有層次，食得出食材新鮮而且服務態度優惠；總括而言，嚟呢度搞第一粒泰國米芝蓮星星，又或者當係純體驗高級泰菜，呢度都唔會令人失望！
餐廳名字取自發起人Khun Patara Sila，佢哋同藍象一樣係已成功進軍世界各地嘅知名泰菜品牌，於倫敦、新加坡、北京甚至維也納都有分店。餐廳位於Thong Lor，但距離BTS站真係唔算近，大熱天時想保留返啲體力嘅建議都係揀點對點Call Grab / 篤篤啦~
外觀上嚟睇呢度極似有錢人家住宅，室外小涼亭係好多人睇到都想坐嘅用餐位置，但大家要留意返天氣係咪適合，想舒服地涼冷氣嘅都係影完相入返室內啦！至於嘢食方面，呢度係走Fine-Dine路線嘅，想唔用腦嘅可以直接選擇套餐(分4種；泰銖950/位起；亦設有素食者菜單)，想散叫嘅就可以參考吓Youtuber Joey豚長呢條片：
Khao係由之前喺曼谷文華東方任職28年嘅前主廚Chef Vichit Mukura所創立，餐廳名喺泰文係解「米飯」，室內設計亦以穀倉為概念，晏晝嚟時日光灑落餐廳每個角落，氛圍舒適得嚟又有淡淡雅緻感，唔會話因為係米芝蓮星級店就樣樣都走浮誇路線。嚟呢度，基本上大家都唔使煩惱要叫咩食，事關大部分客人都係衝住精選食材加上價格合理嘅6道菜/8道菜/10道菜Chef’s Table餐而來。
如果真係怕食唔哂或者鍾意散叫嘅，可以先留意當季限定餐牌然後再加幾道必叫菜式如：由宮廷菜式改造嘅前菜4小碟、於當地市場搜購食材製作嘅超Fresh柚子蝦沙律、唔使解釋咁多嘅蟹肉奄列、罕見嘅泰式蒸魚梳乎厘及米芝蓮話一定要食嘅泰式草莓大福。
於2018年年尾先開始營業，然後2020年開始就獲得必比登推介，可見呢度嘅餐飲質素就算唔係一直持續向上都一定係穩定地高質。而事實上呢間Fusion泰菜的確係極受歡迎，包括五辛(辛香料)滷五花肉及糖心蛋就連米芝蓮都讚話嚿肉索哂汁又充滿豬肉油香，連配菜豆腐都好好食；帶馬拉風格嘅串燒拼盤，勁適合叫嚟做送酒小食；甜品有邪惡榴槤千層蛋糕又有特色椰奶牛油果湯圓，所以唔少當地人都會一家大細過去用餐，週末晚餐時段特別爆滿，撞正呢啲時間想去真係唔好懶做多個步驟——網上預約定啦，都係五分鐘內就搞掂嘅事啫！
5. Methavalai Sorndaeng
剛剛介紹完間近年開嘅，跟手就一齊睇吓呢間於1957年已經開業並已連續獲得5年米芝蓮一星嘅老牌餐廳啦！呢度由內(Menu)到外(裝修)都瀰漫住經典懷舊嘅氣息，招牌菜為泰南酸咖哩、辣炸魚糕、菠蘿炒飯等，每日正餐時間都會有駐場泰國歌手做現場音樂表演，據講唔一定只唱泰國懷舊金曲，都有人聽過演唱鄧麗君嘅歌㗎 (帶爸爸媽媽嚟佢哋分分鍾都會話覺得似以前後生啲茶舞廳)！
