今年泰國曼谷首度推出《米芝蓮指南》，星級餐廳固然係高檔餐廳或者歐洲菜系為主，所以一眾焦點就落咗喺車胎人推介同街頭美食推介，車胎人指一餐飯平均消費低於1000Baht(約$240)的餐廳，一共有35間。而米芝蓮評委更特別挑選咗28檔街頭小食，證明泰國飲食文化豐儉由人而且多元化！
好似呢一間Ann Guay Tiew Kua Gai咁，就憑一道家傳炭火炒河，炒到今年米芝蓮街頭美食推介返嚟！舖頭已有五六十年歷史，老闆由擺街檔開到入舖，現時由女兒Ann三兄妹主理。有兩間分店，但總店先至有推介。
開飯仔走入埋廚房直擊，火光熊熊但唔係好大油煙，因為用嘅炭都係最靚貨色，唔會多炭屎飛來飛去。只見師傅密密手不停炒，由煮雞肉、落河粉、加配料同雞蛋全程炭爐炮製，師傅要不停轉動鑊及拋鑊，控制火候啱啱好！一路睇住師傅炒、一路聞住香味同聽住炭火燃燒嘅聲音，食慾大增呀。
招牌菜當然係炒雞河配半熟蛋，雞蛋微生有流心勁誘人，而粗河粉炒出來係一餅餅唔係一條條，但食都好軟滑，兼食得出陣陣炭香。講明先落咗豬油炒架，所以香口到不行！新鮮肥雞髀肉同樣係亮點，肉質超滑又juicy，價錢視乎配料由50Baht至100Baht，又平又正難怪最高峰可以賣500碟！
其他招牌菜都邪惡又好食，好似有雞肉湯河、炸雞皮、炸魚餅等都係50Baht起。舖頭4pm做到凌晨1am，冇BTS要專登搭車去，但信我，係值嘅！
地址：420, Luang Road, Pom Prap Sattru Phai, Bangkok, Wat Thep Si Rin, 10100
延伸閱讀：
文、相、片：Perrins