如果有年年留意住米芝蓮指南嘅話，應該都會留意到泰國米芝蓮2023年開始新增泰國東北部嘅呵叻府、孔敬府、烏汶府同烏隆他尼等4個城市嘅餐廳，所以一共有441間餐廳入選。整體嚟講，今年二星餐廳名單維持不變，而一星餐廳則多咗5間(其中1間係晉升獲星)，而且5間都係位於曼谷！

Haoma (一星)


呢間主打Farm-to-table及0浪費嘅印度料理餐廳除了摘下米芝蓮一星更同時獲得綠星榮譽，餐廳食材由蔬菜、魚到肉全部都來自佢哋收集雨水過濾再循環再用嘅自家魚菜共生農場，因此佢哋可以穩定地組合出最新鮮、最合時嘅美味佳餚予客人品嚐，且擺盤都突破大家刻板印象，極為精緻小巧。而最可以體現到有3,500年歷史嘅印度菜新派可以直接選擇叫份10道菜左右嘅海陸Tasting Menu，而且呢度亦都兼顧到素食者，一樣有素菜版Tasting Menu㗎！

Baan Tepa (一星)


基於對各種香料嘅理解及運用都有獨到見解，女主廚Chudaree Tam Debhakam在泰國飲食業界中向來薄有名氣，她於2020年使用祖母嘅兩層舊屋改建而成的菜田X餐廳更曾入選為2021年亞洲50最佳餐廳之一。嚟呢度用餐，大家除咗可以食到各種跳出傳統泰國框框、又靚又香令人眼前一亮嘅新派泰菜之外，更有機會跟佢一齊參觀高達24種香料嘅香料園，增進相關知識之後再食落肚就更放心又更滋味啦！

Potong (一星)


餐廳取名自原身百年建築「普通大藥房」，但事實上佢哋嘅中泰Fusion菜實力絕對非同小可，拎完餐廳及酒吧設計2022及亞洲最佳新餐廳2022等獎項之後，Potong名聲大響，又被喻為曼谷唐人街預約超困難餐廳，因此，大家對於佢接住落嚟會拎到米芝蓮星星都並唔感到驚奇。講到咁勁，實際上又有咩食呢？餐廳嘅菜色都會強調五個元素——「鹹、酸、香辛、質感同香氣」，主廚認為每道菜都應該要有延續性同故事，所以游走於其中嘅食客就會同佢一齊經歷呢個過程，最後結合成美好又美味嘅回憶。由於佢哋嘅套餐係招待20道料理，用餐時間最少都需要2.5小時(甚至有唔少人話食足4個鍾！)，成功預約到嘅記得要將時間安排好啊！

Maison Dunand (一星)

曾經擔任文華東方酒店LE Normandie主廚嘅Arnaud Dunand，為餐廳成功摘得米芝蓮二星之後決定自立門戶，於2022年頭開創咗阿爾卑斯木屋設計風格嘅Masion Dunand，並極速獲得米芝蓮一星！大家可能會問，咁係咪即係去新店都係食同一樣嘢？當然唔會啦！新店會回歸返主廚嘅童年同故鄉——法國薩瓦(Savoie)，結合當地食材同多年嚟學到嘅泰北菜、日本菜、法國菜手藝，演繹出食材最純樸但又帶有深度嘅味道畀大家欣賞。所以話，只要你係有實力嘅人，真係去到邊都會閃閃發光！

Signature (晉升一星)


以「從泥土種出料理」為理念嘅法國料理餐廳Signature，終於成功踏上新里程碑！與時並進嘅現代派法國菜每道都極為精緻又考技巧，食用花嘅點綴又恰到好處，而且訓練有素嘅員工又會細心服務同講解，難怪好多食客都讚不絕口！呢度有5道菜同8道菜套餐(亦有素食者5道菜套餐！)，菜單內容會不時轉換，晚市座位亦都只有30個，所以如果有心想食記得要提早預約啊！