Kin Kub Koi
店主一家經營海鮮店多年，憑藉累積落嚟嘅知識，烹調出嚟嘅海鮮完全保留到食材原先鮮味。食客特別喜愛呢度有寬敞嘅座位同停車場，食物如蝦膏炒蟹、炒大河蝦等大部份都份量十足又惹味，係性價比超高之選。
Baan Pee Lek
非常受當地人歡迎、由小別墅改建而成的溫馨小店，走進去就好似係探訪當地人咁，完全唔會覺得侷促。餐牌種類豐富，多人推介嘅嘢食有牛油炒滑蛋、鹹魚豬肉碎香料餅、炸豬肉及瑪沙文咖哩排骨。
Yoong Khao Hom
本店喺泰國南部蘇梅島，於2017年開始進駐曼谷，目前有兩間分店，而獲得必比登推介嘅係相對少旅遊Blogger推介嘅I’m Park Chula店。佢哋主張融合3種南方文化美食(泰式、泰式-穆斯林同中式)，主要食材都會從蘇梅島空運過嚟，設有中文Menu。店家自己特別推介必食泰南咖哩檳榔葉鮮蟹肉湯、黑汁炒魷魚、竹笋椰奶蝦湯等。
Samlor
泰國通近年都介紹過嘅新派泰菜，門口就有大大部三輪車 (Samlor就係呢個意思)掛喺度非常搶眼。除咗名人都話好邪惡嘅流心炸蛋飯，同唔使諗食咩嘅主廚套餐之外，亦可以單點每日轉款嘅是日主菜同是日鮮魚，想體驗到一不樣嘅街頭小食就嚟支持吓呢班泰國後生仔啦！
亦即係開業已經超過60年嘅鄭良明-豬雜粿什，雖然有中文店名但貌似到而家都依然得泰文餐牌。不過好彩都係圖文對照嘅，第一次食又唔怕內臟嘅可以直接叫有齊小雲吞、炸豬皮、豬肚等乜都有嘅雜錦湯麵，如果怕嘅亦可以叫返脆皮燒肉麵/飯。有興趣嚟嘅朋友都要留意，因為價廉物美嘅關係，平日繁忙時間呢度係極受本地人歡迎，建議提早或推遲少少嚟就唔使排咁耐囉~
其他新上榜必比登推介曼谷餐廳：
