SWEET SWEET布吉之旅💞浪漫系晚餐4選
2023-09-24

小情人去旅行散心、慶祝紀念日,又或者係剛結婚嘅朋友去蜜月,點可以餐餐都去掃街或者到時到侯求其搵間餐廳食就算呢?就算係去布吉住Villa住Resort,貪方便想日日都留喺酒店浸水同食酒店餐廳都好,以下4間酒店餐廳都一樣可以提供到靈感畀大家,話唔定大家可以喺呢度搵到想住又想食嘅好地點,一次解決咗去旅行嘅兩大煩惱呢!


1. Silk Restaurant & Bar



要浪漫唔一定要豪華嘅!呢度裝修係走深棕木色系,配搭溫和嘅黃色燈光,就算冇金光閃閃嘅裝修、冇絕美景觀都一樣令人感受到咩叫低調優雅,而且呢度有採用布吉島當地食材去製作嘅泰國菜(推介菜式有椰汁雞湯、好igable嘅網絲蝦卷及青咖哩),每個星期五晚上更有現場傳統歌舞表演,無論係作為成個旅程嘅起點,又抑或係留喺布吉島上最後一餐晚餐都咁令人難忘!溫提:呢度菜式依據咗遊客口味調整辣度,如果自問係超級食得辣嘅話記得落單時講聲要加辣啊!


2. Tree House (ทรี เฮ้าส์)




可能好多人去布吉都會第一下諗起要去海邊餐廳食海鮮,但其實論有特色同儀式感,位於安納塔拉邁考渡假村 (Anantara Mai Khao Phuket Villas) 內嘅樹屋餐廳一定唔會令人失望!呢間日式Omakase餐廳係圍繞住一棵榕樹而建,客人只需要沿住螺旋樓梯上去,就會發現「藏」於樹內、充滿神秘感嘅「別有洞天」!大家可以喺呢度一邊欣賞360度日式庭園美景同涼爽海風,一邊享用時令食材製材嘅各式日式佳餚及精心配搭嘅清酒/雞尾酒 (亦設有素食者Menu,須事先備註)。特別要注意嘅係,由於呢度係半戶外式設計,怕熱怕蚊嘅朋友就要帶定風扇仔同噴定蚊怕水喇!


3. Rock Salt




如果選擇入住布吉南部奈漢海灘(Nai Harn Beach)周邊嘅Resort,特別係Book酒店Package時冇揀到配埋酒店餐點嘅朋友,不妨考慮嚟呢間擁有超高人氣、位於五星級酒店The Nai Harn內嘅Rock Salt餐廳!呢度嘅賣點係座位對正超級無敵大海景,莫講話要影到海天一色靚相係易如反掌嘅事,只要天氣唔係特別差,仲可以非常清楚咁望到對岸嘅神仙半島(又名神之海角)!呢度營業時間朝7晚10,當中又以影相拍片都係最好時機嘅朝早8:00,及可以睇到Magic Moment嘅黃昏時段特別受歡迎,加上每日晏晝17:30~18:30係Happy Hour時間,同情人飲杯香檳再直落鋸扒歎生蠔,真係Chill到唔捨得走!


4. Blue Mango Bar & Grill




提到遠離市中心、僻靜得嚟又有情調、適合同伴侶盡訴心中情嘅餐廳,就不得不提呢間喺Absolute Twin Sands Resort內嘅泰西Fusion餐廳喇!佢哋有分室外同室外座位,整體裝修佈置以藍色為主調,予人成熟優雅嘅感覺。而佢哋之所以能夠屢獲旅遊網站推介,絕對係同豐富嘅餐點選擇(多人推介嘅菜式有Panang咖哩及炒金邊粉)及良好服務質素有關,甚至有遊客話成個布吉遊日日喺度食都唔厭!**由於地點真係相對隔涉,所以酒店有提供穿梭巴士予住宿者同食客來回芭東海灘,詳情可以向餐廳查詢。

OpenRice TH Editor
餐廳資料
更多
收起
本月熱門
Youtuber推介▶️!泰國旅行必食!(持續更新)
6天前
2024🏵️亞洲50最佳餐廳 - 曼谷篇 (1-99名)
7天前