曼谷米芝蓮一星商場內古法精緻泰菜

泰國菜好似好難登上大雅之台，通常都係簡樸為主，唔太講究賣相，大部分菜式都係一大盤share來食。不過呢間由澳洲籍大廚Jason及泰籍女廚主理嘅Paste，就將古老食譜流傳到而家嘅傳統泰菜重新包裝，味道依舊，但就加入創新元素同精緻擺盤，變成一道道靚到似法國菜咁嘅菜式。

Paste來頭唔少，雖然從未成為亞洲50最佳餐廳，但年年獲得當地傳媒頒發獎項。由澳洲籍大廚Jason及泰籍女廚Bee主理，原本位於小巷之內，憑新派泰菜一炮而紅，更被高級商場Gaysorn力邀進駐。裝修簡約華麗，座位唔多，一副高級餐廳格局。

菜式做法根據過百年古老食譜再加以改良，如西瓜三文魚鬆沙律，是1809年泰皇拉瑪一世於玉佛寺開幕時指定菜式，咖喱更加係精彩，有多款唔同做法及食材配搭。Chef Bee選用泰國各地出產嘅香料同食材，甚至刁鑽到榴槤都用埋，帶出泰國菜多樣風味。

西瓜三文魚鬆沙律 450Baht

煙鱒魚西米丸子 400Baht、煙鯖魚及鴨肉配腰果葉（免費前菜）

（左）脆豬腳酸辣湯 550Baht、（右）泰南紅蟹肉咖喱 850Baht

每一款咖喱，都用唔同香料炮製，好似黃咖喱就用黃薑製作，味道香滑；Panaeng紅咖喱重花生味，質感較杰；而配羊肉嘅Massaman咖喱就加入咗泰國小豆蔻，面層嘅係未熟嘅新鮮金枕頭榴槤，有如椰青般香氣，加強層次感。

（左）紅咖喱配澳洲穀飼牛 850Baht、（右）瑪莎文羊肉咖喱 850Bhat

咖喱炒蟹 950Baht

菜式賣相精緻吸引，唔少菜式加入當地農場出產食用花裝飾，而且用上大量香草香葉。甜品就貼近法式，由年輕女餅廚操刀，如青檸焦糖燉蛋用上的莓果、啤梨撻以泰國杏仁醬配椰子雪糕，睇得又食得！

法國活藍龍蝦 1600Baht

啤梨芝士撻配野生蜜糖及杏仁醬、配黑芝麻及椰子雪糕 500Baht

兩人用柑橘撻配香蕉及椰子雪糕、西瓜及芒果雪葩 700Baht

（左）斑蘭茉莉雪葩 500Baht、（右）熱情果芒果朱古力球 500Baht

更多曼谷米芝蓮推介：

文、相、片：Perrins