農曆新年期間想離港休養生息，已經買咗機票嘅朋友安排好行程未？如果打算去泰國Chill & Relax，又點少得去商場食、買、玩呢！今次介紹幾間餐廳地點優越，分別位於ICONSIAM、Central World同新商場ONE BANGKOK，氣氛熱鬧得嚟交通方便，用BTS / MRT即可直達無煩惱，無論係咩年紀都適合喺呢幾個地點停留大半日甚至係一日！
Cafe Chilli 
Cafe Chilli雖然個名有辣椒，但佢唔係咩菜式都賣辣，相反係以採用優質食材、調味正宗嘅東北泰菜為主打！佢哋嘅餐點選擇非常豐富，招牌菜有開胃又健康嘅牛油果腰果青木瓜沙律、泰北四色菊府特產薑黃藤黃果烤雞、東北辣牛肉湯及可以一口氣品嚐到炸雞、炸豬肉、泰北酸香腸等特色Finger Food嘅雜錦伊善小食拼盤。呢四款料理都可以喺預約訂座訂餐Menu (2人Premium Sharing Set 及 4人Premium Sharing Set) 入面搵到，價格除開每位都唔使港幣$100，抵食！
呢個品牌分別於ICON SIAM、ONE BANGKOK與Queen Sirikit National Convention Center都有分店，而ICON SIAM分店嘅特色係室外座位可以欣賞到湄南河河景，如果時間夾得到，仲可以用唔錯嘅角度欣賞到水舞表演，農曆新年呢段時間嘅天氣正好適合！
Lert Laow
肉肉愛好者，尤其自問係牛魔王嘅話就一定要識呢間於2024年尾先登場嘅泰式火鍋+湯麵店！佢哋位於One Bangkok Parade，口號係「Love at first shop」，湯底係用26種香料慢火熬煮5小時而成，味道濃郁醇厚，微涼天氣下飲落十分舒服，再配上肉質嫩滑嘅牛舌 / 神戶牛肉 / 黑豚肉同秘製醬汁，真係好易令人忍唔住一啖接一啖，完全食唔停口！
South Tiger Restaurant 
嚟得泰國想食勻天南地北各種口味，大家可以去Central World入面呢間裝修以藍白色為主調，設計得非常時尚、供應泰國南部美食嘅South Tiger！南泰風味用大量香料調味，口味較重，多用椰子、山竹、鳳梨、椰奶及海鮮入饌。
度就可以食到香葉（Liang Leaves）炒蛋、南泰五花肉咖喱，多人聚會嘅話可以叫埋人氣菜式：魚露炸鱸魚、薑黃炸鱸魚及大蝦冬蔭功，想方便落單嘅亦可以直接預訂時揀埋7道菜4人套餐~唔少人都話呢度口味正宗得嚟有略略調整辣度，就算係唔食開大辣嘅人仕都可以安心食用，萬一真係好怕辣嘅記得同店員講聲要走辣喇！
Samosorn Thai Restaurant
上面就介紹咗適合喺One Bangkok午膳、氣氛熱鬧嘅火鍋餐廳，但既然去得呢個佔地咁大嘅商場，就乾脆逗留多啲時間慢慢逛啦！想搵適合兩人靜靜地晚飯、氛圍比較高貴典雅嘅泰菜餐廳，可以行過嚟The Storeys呢邊試試走精緻Fusion泰菜路線嘅新餐廳Samosorn！佢哋值得一試嘅菜式有油封鴨腿紅咖哩、蝦頭油炒大蝦、松露魚露蟹肉炒飯、蒜炸梭子魚。
查看餐廳資料——
👉🏻 Café Chilli - Queen Sirikit National Convention Center
👉🏻 South Tiger Restaurant - Central World
👉🏻 Samosorn Thai Restaurant - One Bangkok
