White Flower Factory （白花樓）係曼谷嘅人氣泰菜餐廳，2004年於Bamrung Mueang Road開業，10年後更於連接BTS Siam站嘅Siam Square One開分店，多年以嚟一直相當受當地人歡迎，講起家庭聚會同食下午茶都會有好多人即刻諗起佢！

呢間餐廳另一個知名度極高嘅原因係……店名係由泰國皇室——瑪哈·扎克里·詩琳通公主殿下（HRH Princess Maha Chakri Sirindhorn of Thailand）命名，連招牌都係由公主親自題字！

今次開飯仔就同朋去位置極級方便嘅Siam Square One分店，從BTS Siam站4號出口行然後直接搭扶手電梯上4樓就可以，唔怕塞車、唔怕迷路！而我哋當日就選擇10:30開門時間抵達餐廳，一嚟係為咗避開午飯時間人潮，二嚟係為咗確保之後有足夠時間食飽行街！

餐廳裝修走簡約工業風，落地玻璃顯得室內光線充足、明亮寬敞，另外如果你本人或同行朋友係鐵路迷，就更加要嚟呢間分店！因為佢哋嘅窗邊座位可以直望到列車穿梭㗎！

話說呢度嘅Menu有成30幾頁，但大家唔使擔心睇唔明，因為佢哋係提供埋中英日文！飲品方面，我哋就揀咗提神得嚟又有泰式風情嘅椰子美式（Coconut Americano）及芒果印度乳酪（Mango Lassi），椰青水加咖啡呢個組合十分提神，而後者就清新健康！另外呢度亦有榴槤Latte、橙啡、泰奶沙冰、柚子抹茶及斑蘭果汁等特色飲品~

介紹完飲品當然就要講吓食物啦！嚟得泰國又點可以唔試美國CNN Travel全球最佳美食評選中多年蟬聯第一名嘅瑪莎曼咖哩呢？White Flower出品非常濃郁，食得出落足香料，搭配香口烤餅味道平衡得剛剛好，而雞肉亦保持到肉質嫩滑多汁！

朋友就話更愛呢度嘅泰式炒河（Pad Thai），首先味道唔會過酸過甜，配料有齊蝦、豆腐、芽菜同韭菜，河粉質感爽滑唔會過濕，感覺非常正宗！

另外我哋仲叫咗冬蔭功大蝦湯，酸辣滋味一如既往地醒胃！White Flower有將辣度調整至大部分食到小辣嘅朋友都飲到，怕辣人仕可以先輕嚐！

叫得唔多主食類就係為咗留肚食甜品！嚟White Flower係一定要食呢件被唔少Foodie評為曼谷世一嘅椰子蛋糕！佢出色在味道層次豐富，由頂層爽脆有咬口嘅椰子絲到下面夾喺蛋糕入面嘅粒粒椰肉，加埋輕盈忌廉同鬆軟海綿蛋糕，突出清甜椰子味同時又唔會過份甜膩！據聞佢哋係嚴選新鮮椰肉去製作，難怪推出市面至今已賣出超過400,000件，太晏嚟真係分分鐘會錯過！

另一樣都係必食嘅甜品係泰式奶茶千層蛋糕（唔使數，呢度係有十層班戟皮），驟眼睇會擔心會唔會過甜，但事實上甜度OK仲有好明顯泰式奶茶茶香，食完一啖會忍唔住手再接一啖，好邪惡吓！

兩款經典蛋糕以外，呢度嘅甜品選擇仲有好多！譬如話榴槤慕絲蛋糕、雙重抹茶提拉米蘇蛋糕、香芋蛋糕、牛油蛋糕、Cappuccino千層蛋糕、椰子雪芳蛋糕及傳統布朗尼等樣樣都令人躍躍欲試！

而家仲有特別推廣，只要惠顧滿500 THB或以上就可以憑券免費獲得泰式奶茶雪糕或椰子雪糕！使用時記得向店員出示呢張電子券啊！

無論係邊一間分店都好，去White Flower用餐總係令人覺得安心，食物質素穩定且價格合理。去Siam Square One交通固然只要搭BTS即可，若果係自駕遊嘅朋友就可以選擇去Bamrung Mueang Road本店，附近有收費合宜嘅停車場！另外，如果一大班人去 / 有意去開Party亦可以預約包場 （電話：02-252-2646 / 099-002-0897）！

最後嘅最後，我哋食完甜品都忍唔住要叫多杯凍泰式奶茶先去行街。朋友食完亦話下次嚟曼谷玩一定會再訪！

WHITE FLOWER FACTORY SIAM SQUARE ONE 02-252-2646 / 099-002-0897

WHITE FLOWER Bakery & Restaurant BAMRUNGMUEANG 02-225-2749 / 086-012-8722

WHITE FLOWER CAFÉ SAM YAN 02-224-8918

• Facebook: /whiteflowerbkk

• IG: @whiteflowerbkk  

• Tiktok: whiteflowerbkk

• Website: https://whiteflowerbkk.net

• LINE: @whiteflowerbkk