去曼谷食德國菜？唔係啩！係呀，仲保證你喺香港都食唔到！Sühring呢間德國餐廳，由兩位來自柏林嘅孖生兄弟Thomas及Mathias Sühring開設，兩位同時亦係總廚。開業一年，於今年奪得亞洲最佳餐廳50嘅第13位，比起唔少知名泰國菜排行更高！於首屆米芝蓮，穩奪一星。
Sühring兩兄弟之前於歐洲唔少星級餐廳打滾，後來選擇於曼谷定居工作，已經有10年。曼谷德國餐廳唔多，仲要係fine dining就少之又少。講起德國菜，一般人只諗起啤酒、香腸等，兩人希望可以將突破典型，以摩登手法及外國入口靚食材，重新包裝德國傳統地道菜式，甚至係自己屋企嘅家常菜。
其實開飯仔都係第一次食德國菜fine dining，估唔到真係有啲驚喜，而且食完12道菜真係飽。前菜有迷你啤酒同pretzel，pretzel通常都係蝴蝶形狀，呢度整到圓形，咬落有麵粉香亦唔過硬。啤酒係甜蘋果酒，酒精度低。
仲有三道前菜包括北歐風嘅鱒魚子酸忌廉脆筒、鹹豬手肉凍同洋葱餡角，廚師將大大份豬手製成肉凍，夾住變三文治，仲有少許酸菜味，好似真係食緊鹹豬手。
之後有個小白紙盒上枱，原來係柏林著名街頭小食－咖喱香腸！配埋用薯仔蓉製成薄片再風乾嘅薯片，好似零食一樣！
唔好睇少呢份沙律，係用咗27種蔬菜及香草製成，再配上龍蝦肉及松露，聞落有松露香，食落有軟、脆、爽、滑等質感同唔同程度嘅清新。
麵包同醃菜係德國菜重要一環，呢度麵糰用嘅酵母已經發酵三年，鄉村包配風乾牛肉同醃青瓜，雜穀包配檸檬醃鱸魚及芥末。酸種麵包麥味濃，加埋自家製醬汁一齊食，連唔鍾意食麵包嘅開飯仔都覺得好食。
主菜有鱒魚、Spatzle蛋麵同乾式熟食匈牙利鴨胸，慢煮鱒魚軟滑，配自製番茜西米口感好特別。Spatzle蛋麵係德國傳統麵食，呢度係自家製，配埋芝士及洋葱，簡單好味。鴨胸亦腍身帶羶香，食到呢度，已經好飽。
甜品都仲有三道，先來清新嘅Gin & Tonic配酪奶，之後有朱古力配布冧一雪葩，開心果形嘅忌廉好精細！最後就有兩兄弟外婆家傳蛋酒作結，真心好滿足。
餐廳行fine dining路線，係咪貴夾唔飽？晚市12道菜，每人2,900Baht，大約$700左右，以米芝蓮餐廳嚟講都算唔貴喇。
地址：No.10, Yen Akat Soi 3, Chongnonsi, Yannawa 10120 Bangkok
延伸閱讀：
文、相、片：Perrins