「平靚正+任食」向來都係大家難以抗拒嘅組合，加上天氣濕熱，留喺室內歎住冷氣食大餐就更爽更有食慾啦！而且一大班朋友或同一家大細去旅行，食自助餐更係超方便之選！鍾意食甜品做正餐又得，鍾意食海鮮亦唔使怕同行有人敏感，怕辣嘅又可以自己慢慢揀唔使硬頂，總之曼谷有咁多人氣自助餐，總有一間啱心水嘅！睇完覺得正就即BOOK啦！
✨傳說級！自助餐界天花板
近期一講曼谷自助餐，好多人都會第一時間提起呢間！之所以有咁強嘅人氣，係因為呢度食物款式多之餘仲有接近「Fine Dining」嘅質素！平時自助餐只有少量即叫即做嘅攤位，但呢度係直情有一份可以任叫任食嘅Menu，大家只要行埋去This This This（其實記號碼就得）就可以返埋位等食！
必試嘅嘢食包括即炙澳洲和牛壽司、現煮澳洲和牛船麵、松露湯配牛角包、泰北咖哩麵，鍾意海鮮嘅朋友亦可以狂啪生蠔、各式新鮮刺身、烤河蝦以至泰式生醃生蝦或三文魚！價錢方面，呢度定價唔係單睇成人同時段，係視乎主菜選擇而定，最優惠嘅選擇係食到芝士三重奏龍蝦（係3選1主菜）嘅Pack A 每位$480，而食得豪嘅朋友亦可以選魚子醬體驗+足一板馬糞海膽盛宴嘅Pack N，盛惠每位$994。
2024年3月尾新開，新店位置喺Gayson Amarin商場入面，鄰近BTS Chitlom站及四面佛，沿路仲會路經當地最新旅遊熱點——Louis Vuitton喺曼谷開設嘅大型品牌概念店，編排行程嚟講，呢個位置冇得輸！嘢食方面大致上都同The Sense Pinklao店一樣，Youtuber 泰國小阮都拍咗片詳盡介紹過4大名物。留意返，呢度嘅價格係貴啲啲嘅，如Pack A呢度係收每位$540，但計返來回搭的士/Grab錢其實都唔差得遠，所以好多人都認為除非想去嘅日子喺新店呢邊Book唔到，否則都係建議嚟呢邊！
✨方便又抵食！商場內All You Can Eat
呢間位於ICONSIAM商場入面嘅Buffet都公認係去曼谷必食之選，佢有3大優點：性價比高、食物種類豐富及行商場前後都可以去食，非常適合第一次遊曼谷或帶住一家大細嘅朋友去！呢度Weekday（星期一至五）價格每位只須$264，平常Weekend就$280，另有追加任食龍蝦、鵝肝同海膽嘅Premium Menu，每位$735。
嘢食方面，以基本Plan嚟講2小時任食已包生蠔、刺身、燒/焗大頭蝦、即煮意粉、松露湯配牛角包、和牛船麵及即燒嘅和牛壽司，好多人都話佢哋嘅大頭蝦供應源源不絕且多款，愛好呢味嘅朋友剩係食呢樣都回本！此外佢哋個甜品Section都好多人大讚，有Häagen-Dazs雪糕任食，同埋記得唔好錯過巴斯克蛋糕同即叫即整梳乎厘啊！
而家多咗人選擇一去旅行就去十日八日甚至旅居，就算再鍾意食泰菜，日日食都怕厭，想換一換口味可以揀嚟呢間頗受當地人（尤其係年輕人）嘅日式自助餐！餐廳位置處於Siam Paragon商場入面，依據所選擇嘅食物種類及數量有不同價位。目前最平嘅Plan係星期一至五限定嘅Gold Buffet，$198可以任食2小時壽司、刺身、串燒、鐵板燒、日本蜜瓜及Häagen-Dazs雪糕等共140款菜式。中價Plan收每位$420就增加多50款食物，包括味噌燒扇貝、吞拿魚Tataki配明太子烏冬、泰式生醃蝦/三文魚及各式抹茶特飲。而最豪嘅Plan則可以無限食燒A4和牛、拖羅壽司、鵝肝壽司及海膽壽司等共200款食物，收費為每位$672。
✨五星級酒店內任飲任食
呢間以航海為主題、可以欣賞到湄南河美景嘅餐廳+酒吧位於曼谷皇家蘭花喜來登大酒店內，佢哋只於晚上供應自助餐，亦唔似上面其他餐廳咁有幾種級數可以任君選擇，統一價$478，包自選2款特色菜式、1杯特調Mocktail及超過20款任點菜式：特色菜有燒波士頓龍蝦、紐西蘭羊架、炭烤河蝦及指定生蠔一打等；任點方面則有白酒青口、蟹肉卷、海鮮天婦羅、Ahi Tuna（夏威夷吞拿魚刺身)、冬蔭海鮮闊條麵等。講真呢個價位剩係食兩款特色菜已回本，加上餐廳本身都係以做2道菜套餐為主，食物質素同服務質素都相當可靠。唯一可惜嘅點係食自助餐一定要坐室內，如果小倆口想浪漫啲坐戶外位，則建議揀返價格低至每位$180嘅Sharing Set / 2道菜套餐！
以下呢6間酒店Buffet曾經喺其他文章都推介過，亦可以透過我哋網站輕鬆預約，大家可以參考返：
Red Oven
📍 So/Bangkok
The Dining Room
📍 Grand Hyatt Erawan Bangkok
📍 Baiyoke Sky Hotel
📍 Royal Orchid Sheraton Hotel & Towers
📍 Millennium Hilton Bangkok Hotel
📍 Renaissance Bangkok Ratchaprasong Hotel
