雖然已經同大家巡咗3圈咖啡店，但相信真正享受箇中樂趣嘅朋友係仲未厭嘅！始終外國冇土地問題，好多主題都可以發揮得淋漓盡致！今次就會帶大家跳出泰國，去感受一下古典、優雅、充滿文藝色彩嘅歐陸風Cafe可以有幾癲啦 (雖然肉身仍然留喺曼谷)！
1. B-Story Garden Cafe & Restaurants
完全唔近任何一個旅遊景點，附近亦冇任何可以步行5-15分鐘就到嘅鐵路站，但或者就正正因為呢份「小出走」嘅感覺，令極多當地人都鍾意週末嚟呢間歐陸古堡花園食個飯打個卡。而以旅客嘅角度去睇，更係覺得呢度啲細節位多到令人真正感受到咩叫目不暇給，剩係室內都有幾個明顯唔同主題嘅區域(溫室花園 / 文藝復興壁畫)，再加上仲有帶點荒廢感又可以睇日落嘅天台同會隨住季節改動嘅室內佈置，比如話春天佢哋就放咗招財貓同櫻花喺入口位置，就算係二訪甚至多訪人仕都一樣有驚喜！
講講吓差啲唔記得提呢度有咩食，呢度除咗沙律、薯條、雞翼呢啲輕食之外都有泰式主餐，如果時間上許可大家由午餐食到下午茶或由下午茶食到晚飯嘅，建議可以叫大河蝦墨汁意粉、炸蝦沙律鳥巢、當日精選蛋糕同埋有可愛動物奶泡喺頂嘅冰凍水果茶！
2. The Mustang Blu
比起上面間「古堡」，呢間由19世紀建築(相傳最後一手係銀行)改建而成嘅酒店+Cafe位置就平易近人得多，大家只要搭MRT到華藍浦火車站(Hua Lamphong)過一過河轉個彎就到，Google話呢度係3分鐘步程。由於入口度木門真係相當淺窄加上呢度係知名打卡點，繁忙時間嚟就要有心理準備會有少少「擠塞」。一門之隔，入面嗰陣 #Vintage x #Oddities 味保證可以震懾到大家最少一兩秒，當中新與舊嘅交錯同古舊歐式風情，真係會令人有一時之間穿越咗去一個唔屬於任何時地嘅第三空間咁。
(圖片來源：binlocouple)
返嚟講返啲現實嘢先，餐廳係設有最低消費嘅，每個人最少要叫一樣嘢食或一杯飲品，而呢度嘅平均價格係同香港差唔多甚至更貴 (參考返：SUMMER DREAM - 雞肉沙律380泰銖；SPACE ODDITY LATTE (薰衣草特調咖啡300泰銖)！不過公道啲咁講，佢哋出品嘅食物同飲品質素無論係視覺定味覺都可以畀高分，尤其當行出去望住擺到靚一靚嘅甜品櫃，再唔肚餓都會忍唔住想「不如食一件咁多啦」。
距離BTS Ari站大概15分鐘路程、身處特色咖啡店激戰區嘅Puritan，可以話係呢頭嘅大佬之一，一嚟開業至今都有返咁上下年份，二嚟係佢別樹一格嘅歐風設計——外面攀滿藤蔓而入面係挑空有陽光曬入嚟嘅舒適空間，加上內裡有大量擺放得亂中有序嘅各國收藏品，其他店想模仿可以話99%冇可能！想入嚟見識一下呢個小型博物館，記得入門口要除鞋同埋問準咗先好影相/拍片啊！由於甜品係店家睇心情同季節去設計，當日有咩款式都係要埋去玻璃櫃嗰邊揀，而飲品方面呢度係超~~~級多特調咖啡/茶/朱古力/沙冰/酒，大家最好早少少諗定或者直接問店員推介，否則要睇哂成份Menu再決定飲邊杯都真係唔易！
咪睇佢外表咁「殘」，其實Ittha Boutique Cafe喺2022年6月先開幕，短短一年時間就衝出泰國，成為唔少旅遊記者筆下必去嘅咖啡店，到底佢有咩魅力？答案睇相都呼之欲出啦~咪就係景靚嘢食正囉！呢度樓高3層，頭2層都係用餐區而中心天井位置就有條旋轉樓梯，加埋又大又多嘅圓拱型落地窗，有足夠嘅陽光曬入，令到成棟睇落班駁嘅建築增添幾分暖意，結合埋形成強烈對比嘅現代風格餐檯餐椅，又真係難怪大家入到嚟就影唔停手嘅！
至於講到嘢食正，係因為佢哋非常著重於提供有利環境同健康嘅食品，就算只係一份隨處可見嘅法式西多士都係由雞蛋以至蜜糖同裝飾用水果都都只選用有機食材，完全無添加地製作，配合埋強勁嘅擺盤功力，就算唔特別講起，都食得出佢唔只係普通打卡料！睇完下定決心要去嘅朋友，記得出發前Check Check官方消息，因為呢個場間唔中都有特別活動又唔近任何車站，到時「千里迢迢」地摸門釘就唔好啦！
同樣喺2022先開始營運、外型極似希臘神殿嘅Davin Cafe，位置認真對遊客嚟講唔是十分就腳 (從市區塞入去需時20-30分鐘)，但佢營業時間係每日朝7晚10，安排行程上都真係有返咁上下彈性(都見有人建議可以包車連埋Safari World Bangkok / Chocolate Ville一齊去)，再睇埋入面嘅水泥、鋼筋、落地大玻璃窗、偽大衛像、偽維納斯雕塑，又真係估唔到現代工業風溝藝術品出嚟個Vibe咁有味道喎！咁齋好睇係唔夠嘅，呢度都有唔少好食又好影嘅小食、主餐同甜品如芝士火腿牛角酥、椰奶蛋糕、士多啤梨卷蛋等。但建議大家集中望吓中間個咖啡吧，咖啡迷一睇就知呢度對咖啡係真心唔係扮，佢哋同大部分注重喺呢方面嘅店家一樣提供多種來自唔同國家、唔同風味嘅咖啡豆畀客人挑選，當中又以Dirty同一杯簡單嘅Iced Latte最有人氣。